Bizi duten egoera behin eta berriz salatu ostean, gaurtik hasi eta irailaren 19ra arte kanpaldia egingo dute Jose Maria Arizmendiarrieta ibilbidean. Negoziazio mahaia lortzeaz gain, euren defentsaren berri eman dute.
Kanpaldia hasi eta elkarretaratzea egiteaz gain baina, MCC-ko eraikineraino igo dira manifestazioan, arduradunei hiru idatzi emateko asmoz; lehenengoa Iñigo Lamarca Arartekoak idatzitakoa, korporazioko arduradunei, Ordaindu eta Eskuraturekin negoziatzeko eskatzen duena. Bigarrena, arduradunekin zita bat eskatzeko idatzia eta azkena elkarteek idatzitakoa. Idatzian kooperatiba etikoago eta sozialago bat eskatzen dute; aberastasuna eta lana banatzen dituen kooperatiba bat.
Kanpaldia egingo dute bi astean eta bertan egongo dira 9:00etatik 17:00ak artean, egoera salatu eta herritarrei informazioa zabaltzeko prest. Horrez gain, gaur eta eguenean mobilizazioak iragarri dituzte kanpalditik MCC-ko egoitzaraino, helburu garbi batekin.
