Antxintxika triatloi taldearen proba kuttuna, Antxintxika krosa, hamarkadara helduko da aurten eta oihartzun handiagoa eta lasterketaren jarraipena egiteko asmoz, atzo hitzarmena sinatu zuten Mikel Lasak, Antxintxikaren izenean eta Xabier Urtzelaik Goienaren izenean.
Soraluzen hasi eta Bergaran amaitzen den lasterketa gero eta entzutetsuago bihurtu da azken edizioetan eta iaz pantaila erraldoi batean lasterketa zuzenean eskaini bazuten, aurten pauso bat haratago eman dute. Goienarekin sinatutako hitzarmenari esker, Goiena Telebistan, goiena.eus webgunean eta Asteleheneko Goiena Paperean estaldura handiagoa izango du hamar kilometroko lasterketak.
Azaroaren 2an jokatuko da Antxintxika krosa eta aurreko bederatzi edizioetan zapatutan egin bada ere, aurten domekara pasatzeko apustua egin dute, horrela egun osoko jai bat egin al izateko.
