Arrasateko Gure Esku Dago taldeak Zeziaga denda zenaren atarian eskaparatea jarri zuen maiatzaren 16an. Bart gauean bi erakusleihoak apurtu eta bertan zeuden telebistak ostu dituzte. Bizilagun batek 07:00ak aldera eman du abisua eta udaltzainak bertan egon dira goizeko lehen orduan. Gure Esku Dagok salaketa jarri du Udaltzaingoan eta zerbait entzun edo ikusi duten herritarrei eskatu diete honako helbide elektronikora idazteko: 'arrasate.gureeskudago@gmail.com'.
Eskaparatetik bi telebistak lapurtu dituzte. Hau da, bertan jarrita zegoen beste elementurik –kamisetak eta disko zein liburuez osatutako saskia, besteak beste– ez dute ostu. Zeziagako langile ohi batek ez zuen gertatutakoa sinesten: "100 urtetan ez da ezer gertatu eta orain telebista batzuk jarri eta ikusi zer gertatu den... Harrigarria da. Herri erdi-erdian dago eta arraroa da inork ezer entzun ez izana".
Inauguruzio ekitalditik bi aste eskas pasa dira eta ordutik eguenetan zein egubakoitzetan eskaparate ondoan jartzen dute Gure Esku Dagokoek metroak zein kamisetak saltzeko mahaia, 19:00etatik 21:00etara.
