Pixkanaka-pixkanaka baina euskara ikasten ari dira Arrasateko hainbat merkatari. Urtarrilean hasi ziren klaseak jasotzen, Udalak Ibai Arterekin elkarlanean antolatutako saioetan, eta bi talde osatu zituzten. Talde batean euskararen munduan lehenengo urratsak ematen ari dira, eta bestean, aldiz, euren euskara maila hobetzen dihardute. Esaterako, Aitor Lizarasu Udal euskaltegiko irakaslearen saioetan euskaraz lehen urratsak ematen ari diren ikasleak daude eta bera gustura dago orain artekoak eman duenarekin.
Astean bitan elkartzen dira eguerdietan Kulturaten eta ikasleak ere oso pozik daude saioekin. Euren helburua da, ingurukoekin eta batez ere bezeroekin euskaraz lasai mintzatu ahal izatea.
Merkatarien artean gaztelaniarako joera saihesteko eta euskaraz lasai hitz egiten ikasteko, Aintzane Lasa euskara teknikariak azaldu du beraiek hizkuntza prestakuntza jasotzeko ikastaroak emateko deialdiak egiten jarraituko dutela.
Merkatari batzuk, beraz, ikasi edota hobetu dute euren euskara maila ikastaro horien bitartez. Eta aurrerantzean ere euskara ikasten jarraitzeko aukera izango dute Arrasaten.
