Manifestazio bateratua egin dute elkarte biek, Biteri plazatik aterata. Erretiratuek Fagorren utzitako aurrezkiak bueltatzeko eskatzea izan da mobilizazioaren arrazoi nagusia baina, Mondragon korporazioaren egoitzara bidean, Fagorren eta Edesan lanpostua galdu zuten guztien alde ere egin dute. Dena den, bi plataformen helburu nagusia da kooperatibako buruekin negoziatzea.
Martitzenean, batzarra
Kooperatibaren "isiltasuna eta irmotasuna" ere salatu dituzte, baina aurreratu dute Ordaindu plataformako kideak Fagorreko presidente Josean Alustizarekin batzartuko direla martitzenean. Hala ere, orain arte moduan eta arazoari konponbide bat eman arte, mobilizazioekin jarraituko dutela adierazi dute.
Korporazioaren egoitzaren atarian komunikatua irakurri eta gero, Laboral Kutxako egoitzaren aurretik ere igaro da manifestazioa. Horren ostean, beheranzko bidea hartu dute.
