Ekainaren 8an Gure Esku Bidea lelopean Durangotik Iruñeara egingo den giza-katearekin bat eginez, atzo sinatu zen Arrasaten Erabakitzeko Eskubidearen Aldeko Adierazpena, ekitaldi xume eta hunkigarrian. Gaur, domeka, Eskutik Eskura Eguna egin dute Gure Esku Dago taldeak antolatuta. Taldeko kideak oso pozik agertu dira arrasatearren parte-hartzea ikusita: "Atzokoa hunkigarria izan bazen, gaurkoa errematea izan da", aitortu digu Bixente Elortzak, Gure Esku Dago taldeko kideak. ARGAZKIAK: Domekako ospakizuna • Sinadura ekitaldia
Giza-kateak Arrasateko alde zaharra zeharkatu du, ume, heldu eta sentsibilitate ezberdineko jendearekin. Kiliki eta Erraldoien konpartsa eta jan-edanak arrasater ugari erakarri ditu eta Castellers-en ikuskizuna ikusteko bete egin da herriko plaza.
Kataluniarrek ikuskizun aparta eskaini dute eta aho-zabalik laga dituzte plazara bildutako herritarrak. Aldarrikapenerako tarterik ere egon da: bi dorre egin dituzte eta Ikurrina eta Kataluniako Estelada banderak erakutsi dituzte, bi herrien erabakitze eskubidearen aldarrikapen gisa.
