Duela urtebete inguru sortu zuten Arrasaten Eskuartean taldea eta euren eskulanak eta tradiziozko artisautza bultzatzeko gogoz hasi ziren lanean. Taldea sortuta, azokak antolatzen hasi ziren; dagoeneko joan zen urteko Gabonetan egin zuten azoka bat, udaberrian ere bai beste bat eta baita San Juan jaietan ere.
Oraingoan, Gabonetako Artisau Azoka prestatzen ari dira. Hilaren 23an eta 24an Arrasateko Seber Altube Plazan egongo dira; 23an goiz eta arratsaldez eta 24an eguerdira arte eta bertan askotariko produktuak jarriko dituzte salgai. Guztira 16 postu jarriko dituzte eta azokan zozketa solidario bat ere egingo dute jasotako dirua Gipuzkoako Elikagaien Bankura bideratzeko.
Artisauak gustura daude horrelako azokek aukera ematen dietelako, besteak beste, euren lana erakusteko eta herritarrei bakarrak diren produktuak erosteko.
Vanessa Gonzalez Eskuartean taldeko kideak herritar guztiak animatu ditu azokara joan daitezen.