Hildakoak dira: Jose Inazio Uriarte, 65 urtekoa, eta beronen koinata, Milagros Arana, 57 urtekoa. Eta ospitalera eroan dutena, buruko traumatismoekin, Izaskun Arana, 61 urtekoa, Jose Inazioren emaztea. Gaur goizeko 03:30ean gertatu da ezbeharra, Arrasateko Gesalibar auzoan. Gas leherketaren ondorioz Adape baserria erabat erautsita geratu da, birrinduta. Eta azpian harrapatu ditu hiru bizilagunak. Leherketak eragin duen burrunbak inguruko baserrietako bizilagunak esnarazi ditu, baina AHTko lanetako leherketa bat izango zelakoan ez diote kasurik egin. Eguna argitu duenean, ordea, ohartu dira gertatutakoaz.