1985ean ekin zion AEDk 'Eta hau, zergatik ez euskaraz?' kanpainari. Hizkuntza eskubideen urraketaren aurrean protesta ekintza izan zen, informazioa gaztelera hutsean zabaltzeko ohitura zutenei begira. Idatziotan pegatina jarrita, kontzientziazio lan handia egin zen euskarazko informazioaren alde. Bada, azken asteotan Arrasateko alde zaharrean hainbat kartel eta idatzi gaztelera hutsean daudela ikusita, kanpainari berriro ere heltzea erabaki dute AEDkoek, biltegira joan eta 1985eko pegatina berberak aterata.
