Abian da Sanjuanak prestatzeko parte-hartze prozesua

Arrasateko gaztetxeko barraren bestaldean iragarri dute Kepa Urteaga Kultura zinegotziak eta Jon Garai Kultura Saileko teknikariak Sanjuanak prestatzeko parte-hartze prozesuaren hasiera: "Ez dakit inoiz baino lehenago ari den izaten, baina aurten goiz hasi gara Sanjuanei begira lanean. Iaz denbora aldetik justu ibili ginen eta aurten denboraz ibili gura dugu", adierazi du Garaik. Urteagak, berriz, iazko prozesuaren arrakasta nabarmendu du eta adibide moduan jarri 'Zeuk in zeuk jan' ekintzak 300 lagun baino gehiago batu zituela. Lehen bilera etzi izango da, hilak 28, Kulturateko Loramendi gelan (19:00). Herritar oro dago gonbidatuta.