Udaberriko Hitzaldi Zikloaren hirugarrena dator, "gure herriaren zuztarrak errotzeko"

Zuztarrak Errotuz taldeak, Nabarraldek eta Arrasateko Udalak elkarlanean antolatu dute Udaberriko Hitzaldi Zikloaren hirugarren edizioa. Zikloaren helburu nagusia da Euskal Herriko, Leintz Bailarako eta Arrasateko historian sakontzen joatea: "Gure taldearen izenak dioen moduan, gure herriko zuztarrak errotzen joatea da gure asmoa", adierazi du Zuztarrak Errotuz taldeko Xabier Zubizarretak. Aurtengo zikloa zuzendu dute historia bera kontatzearen garrantzia azpimarratzeari: "Herri guztiek, handiek zein txikiek, egiten dute historia. Baina batzuk kontatu egin dute eta beste batzuek ez; horren garrantziaz jardungo dugu". Zubizarretak berak eta Kepa Urteaga kultura zinegotziak egin dute gaur prentsa agerraldia, Kulturateko areto nagusian. Biak izango ditugu etzi gurean, Goiena Telebistako 'Magazinea'-n (20:15).