Jose Angel Achon: "Arrasate erre osteko krisi garaian, bizitza ikusteko modua erabat aldatu zen"

Arrasate Zientzia Elkarteak antolatutako 'Arrasateko Iragana Astintzen' zikloaren bigarren saioan Jose Angel Achon historialaria izan da gonbidatua. Arrasatearren artean jakin-min handia pizten duen garaia landu du Achonek, Arrasate bera erre zuteneko (1448) aroa, hain justu. Kulturateko areto nagusia txiki geratu da; batzuk zutik jarraitu behar izan dute hitzaldia eta berandu heldu direnak, berriz, ezin izan dira sartu. "Harrituta bezain txundituta nago asistentziarekin, eskerrik asko. Era berean, liluratuta nago aspaldi urte asko pasa nituen lekura itzuli naizelako", esan du hizlariak berak saioa hasi baino lehen.