Aretxabaletako liburutegiak telefonozko ipuin kontaketa antolatu du gaur arratsalderako, Gianni Rodari idazle eta pedagogo italiarraren jaiotzaren urteurrenaren harira. Urriaren 23an jaiotakoa da Rodari, eta ekimena mugikorrarekin egitea, Telefonozko ipuinak, italieraz, Favole al telefono liburuagatik izan da. Haren lana ezagutaraztea eta hari aitortza egitea izan dira ekimenaren helburuak.
17:30ean hasi dira ipuinak kontatzen. Parte hartzaile bakoitzari boluntarioetako bat deitu zaio telefonoz, ipuin sorpresa bat kontatzeko. Guztira, hamabi lagunek eman dute izena entzule gisa, eta hamar boluntario aritu dira kontalari lanetan. Adin tarte zabala izan dute: entzule gazteenak 4 urte ditu eta nagusienak 71. Bereziki pertsona helduek eman dute izena, liburutegitik azaldu dutenez.
Ekimenaren amaieran, 19:30ean, kontalariak liburutegian elkartu dira. Kontalarien artean hitz egin eta kontatu dute nola joan den irakurketa telefonoz, guztiak "oso pozik" zeuden emaitzarekin eta esperientziarekin. Liburutegitik oso modu positiboan baloratu dute ekimena, eta ekimen "polita" izan dela nabarmendu dute.