Mundukide Fundazioak XI. lasterketa solidarioa egingo du gaur Aretxabaletan, Urkuluren inguruetan. Elkartasuna gara lelopean, 30 kooperatibak eta bailarako hainbat norbanakok eman dute izena, osotara, 400 pertsona inguru.
Lasterketa solidarioak hainbat modalitate izan ditu, izan ere, 2004 eta 2016. urte bitartean jaiotako gaztetxoen lasterketa, ibilketa nordikokoko eta oinezkoen martxa eta kooperatiben arteko lasterketa izan dira. Handbike-eko lasterketa ere egin da lehen aldiz, Lana kooperatibako ordezkaritzapean, Bizi Hadi kirol talde inklusiboaren eskutik.
Elkartasuna guztiaren gainetik
Kooperatiben arteko lasterketa izan da, akaso, ekimenaren plater nagusia, eta parte-hartzaileak lehiatzeko prest irten dira irteera puntutik. Azkenean, Athloneko kideak izan dira azkarrenak emakumezkoen kategorian eta kategoria mistoan. Gizonezkoen kategorian berriz, Ulmako kideak izan dira lehenak.
Lasterketa bat izanik, lehia puntu hori hor egon den arren, parte-hartzaile guztiek nabarmendu dute elkartasuna izan dela egunaren zati garrantzitsuena. "Lehia hor dago, hori ez da ahazten, baina, azkenean, Mundukidek antolatutako lasterketa egitera etorri gara, elkartasunaren alde", azaldu du, esaterako, parte-hartzaile batek.
Antolatzaileak, pozik
Mundukideko kideak pozik agertu dira lasterketak utzitakoarekin. "Pozik egoteko moduan joan da. Uste dut jendea gustura egon dela. eguraldiak lagundu du, eta elkartasuna oinarri bezala hartuta sintonia ona egon da", azaldu du Mundukideko komunikazio arduradun Urri Urizarrek.
Ondo errotutako ekimena da dagoeneko lasterketa. Horretaz jakitun, hurrengo urteetan antolatzen jarraitzeko borondateaz gain, beste lurralde batzuetara hedatzeko nahia erakutsi du Mundukideko zuzendari Itsaso Erretolatzak: "Aurrera begira hemen jarraituko dugu. Gainera, bailara honetako kooperatiben erantzuna ikusita, akaso, kanpoan, Bizkaia aldean edo, errepikatzeko aukera aztertzen gabiltza".
Laguntzeko aukera oraindik irekita
Mundukidek lasterketa solidarioa bezalako ekimenekin jasotzen duen babesa Brasil, Ekuador, Kolonbia eta Mozambikeko tokiko erakundeekin kooperatibismoa, nekazaritza-garapena eta enplegua sustatzeko egiten duen lanerako oinarrizkoa da. Lasterketan azaldu zutenez, 20.000 nekazari familia laguntzen dituzte eta 100.000 onuradunengana iristen da emandako laguntza.
Lasterketa ostean ere Mundukideri laguntzea posible dela jakinarazi dute antolatzaileek. Horregatik, parte-hartzaile guztiak gonbidatu nahi izan dituzte, bakoitzak ahal duen neurrian, BIZUM bidez ekarpena egitera, 00989 zenbakira. Norbanako gisa bazkide egiteko aukera ere badagoela gogoratu dute, www.mundukide.org atarian.
