Jardunaldiko lehenengo egunean, eguaztenean, hezkuntzan euskal kulturak duen egoera izan zuten eztabaidagai; atzo, eguenean, berriz, kultur eta sormen industrien egoeran eta erronketan sakondu zuten. Besteak beste, Euskal kultura salgai? galderari heldu zioten Jon Basaguren Izaki Gardenakeko konpositoreak, Amets Aznarez tronboi jotzaileak, Iñigo Etxezarreta En Tol Sarmientoko abeslariak eta Aitor Servier bertsolari eta EHZ jaialdiko antolatzaileak. Guztiek solasaldi “aberasgarria” izan zela nabarmendu zuten.
Antolatzaile lanetan ibili den Eneko Bidegain irakasleak, azaldu zuen ekimenaren jatorria: "Euskal Kulturaren Eragiletza masterra duela hiru urte sortu genuen, eta horren harira hasi ginen jardunaldi hauek antolatzen, masterraren ikerketa-galderak erantzunen bila joateko". Gainera, aurten beste urrats bat egin dutela nabarmendu zuen: "Kultur eta Sormen Industrietako gradua hasi dugu, eta bi eskaintza akademiko horiekin lotuta antolatu dugu bi eguneko jardunaldia". Haren ustez "galdera guztiak" ez dira bi egunetan kabitzen. Alabaina, hizlarien maila altuak, horien inguruan sakon eztabaidatzeko aukera eman duela nabarmendu du Bidegainek. Bestetik, balorazio positiboa egin du; izan ere, ehundik gora pertsona bertaratu ziren campusera.
Huheziko 50. urteurreneko ekitaldiek ikasturtea amaitu arte jarraituko dute, eta, martxorako prestatu dituzten ekintzen ardatza, feminismoa izango da.