ALBISTEAK

Ruben Rodrigues portugaldarra nagusi 86. Leintz Bailarako Itzulian

Mirari Altube Arrese 2025ko abu. 19a, 13:15

Euskadi Fundazioa taldeko Ruben Rodrigues izan zen Durana kaleko helmugan lehenengoa larunbatean, abuztuak 16. Lehen garaipena izan zen txirrindulari portugaldarrarentzat, eta lehenengoa taldearentzat, euskal egutegian.

Txalaparta doinuekin, eta herriko txirrindularitzaren alde lan asko egindako Manolo Zubillaga gogoan, ekin zioten 86. Leintz Bailarari Itzulia lasterketari.

Euskadi Fundazioa bizi azaldu zen 115 kilometro eta Gatzagara bi igoera zituen ibilbidean. Lehenengoan, Luis Garcia lasterketa burua izan zen, eta, ondoren, Yago Aguirre saiatu zen. Ruben Rodriguesek aurrean igo zuen bigarrenean eta ihesaldian sartu zen beste bi txirrindularirekin. Jaitsieraren bukaeran, erasoa jo zuen eta lehenengo helmugaratu zen 02:30:07 denbora eginda. Haren atzetik helmugaratu ziren Gomur Cantabria Infinita taldeko Alejandro del Cid (02:30:09) eta Caja Rural -Alea taldeko Gorka Corres (02:30:14).