Iazko formatua mantendu dute antolatzaileek Ikazkin Trailen laugarren edizioan. Parte-hartzaileek aukera izango dute ibilbide luzea, 23,2 km eta 1.300 metroko aldapa dituen ibilbidea, edota laburra, 14,8 km eta 920 metroko aldapako ibilbidea egiteko. Iazko ibilbideak mantendu dituzte, baina jakitun dira eguraldiaren baldintzapean dagoela hori, izan ere, iaz ibilbide motzeko jaitsieraren "alternatiba" bilatu behar izan zuten lurraren egoeragatik.
Aurtengo berritasuna, ordea, lasterketaren hasieratik, Durana kaletik, Kurtzebarriko tontorrerainoko igoeraren denborak neurtzea izango da. Gaizka de Miguel da lasterketaren antolatzaileetako bat, eta adierazi du herritarren eta korrikalarien artean "pikea" sortzeko egin dutela: "Ea horrekin zer lortzen dugun".
Izen-ematea bide onetik
Dagoeneko izen-ematea zabalik dago eta irailaren 1era arte egongo da horretarako aukera www.rocksport.com webgunean. Kamiseten neurriak aukeratzeko epea, ordea, uztailaren 31n amaituko da. Gaur gaurkoz, 272 izen-emate dituzte De Miguelen esanetan, eta kopuruarekin gustura badaude ere, espero dute 300 parte-hartzaile baino gehiago izatea: "Uste dut lortuko dugula. Bi lasterketak batuta lortuko dugu zenbaki hori". Lasterketak badu inskripzio muga; guztira 400 lasterkari: 150 ibilbide motzean eta 250 ibilbide luzean.
Gainera, zenbakiak erreparatuz, aretxabaletarren parte-hartzea nabarmendu du: "Izena eman dutenen %30 herrikoak dira. Hortaz, oso-oso pozik daude. Momentuz, 84 izen-emate dira aretxabaletarrak".
Boluntarioen beharra
Besteak beste, herritarren artean kirola sustatzea, emakumeen parte-hartzea bultzatzea eta herriko parajeak ezagutaraztea dira Ikazkin Trailen helburuetako batzuk. Dena den, korrikalariez gain, behar-beharrezkoak dituzte boluntarioak: "Iaz boluntario zenbaki polita lortu genuen. Aurten espero dugu berdin izatea, eta herritarrak animatzea". Horretarako, antolatzaileekin harremanetan jarri baino besterik ez dago.
Hala, ohar modura adierazi du antolakuntza taldearentzan garrantzitsua dela korrikalariek, boluntarioek eta ikusleek ingurunean zaintzea, eta hala egiteko dei egin diete.