"Hitzetatik ekintzetara" pasatzeko eskatzen dio oposizioak Aretxabaletako Udal Gobernuari

Imanol Beloki Unamuno 2025ko eka. 3a, 10:24

Agintaldiaren erdialdean, Aretxabaletako alderdi jeltzaleak Udal Gobernuak egindakoaren balorazioa egin du. Oposizioko kideek adierazi dutenez gastu muga ezin da aitzakia izan Aretxabaletarentzat funtsezkoak diren proiektuetan aurrera egin ez izana justifikatzeko.

Aretxabaletako EAJko udal taldeak balantzea egin du agintaldiaren erdialdean. "Lehen bi urte hauetan EH Bilduren Gobernuak behin eta berriz iragarri ditu aurreikusita dauden proiektuak, baina praktikan horietako asko oraindik ez dira gauzatu. Izan ere, azken bi urte hauetan ikusi denez, exekuzio maila oso baxua izan da, eta uste dugu hitzetatik ekintzetara pasa behar dela. Nolabait, proiektuak identifikatzeko orduan ikuspegi nahiko antzekoa dugu, garbi dugu zeintzuk diren aurrera eraman beharreko proiektuak, baina, bizkortasuna falta da", adierazi du Mikel Uribetxeberriak, Aretxabaletako alderdi jeltzaleko bozeramaileak.

Gastu muga ezin dela aitzakia izan azpimarratuz

"Udal Gobernuak behin baino gehiagotan Europatik ezarritako aurrekontu-arauak betetzeko betebeharrari egotzi dio exekuzio falta hori. Errealitate horrek gastua mugatu badu ere, ez du eragotzi proiektuetan aurrera egitea, testuinguru ekonomikoak ahalbidetu duen unean lizitatzeko prest izateko", nabarmendu du Mikel Uribetxeberria bozeramaile jeltzaleak. Gaineratu duenez, "2024an aurreikusitako inbertsioen %29 baino ez ziren gauzatu, neurri batean arau fiskalen eraginez. Hala ere, aurten, joan den otsailean onartutako 2025erako aurrekontuetan jasotako proiektuak lizitatu gabe daude oraindik".

EAJk honako proiektuen errepasoa egin du:
1. Komentua: 2024ko uztailean obrak amaitu ziren, baina ateak ireki gabe daude oraindik.
Debora horretan, aurreikusitako irekiera-datei buruzko informazioa falta nabarmena izan da. Taberna-jantoki zerbitzuaren lizitazioa ere atzerapenarekin dator.

2. Institutu berria: Egindako aurrerapena ez da nahikoa. Gaur egun, etorkizuneko kokalekuko lurzorua erosteko partidak baino ez dira gorde.

3. Iturrigorri pilotalekua: Proiektua idazteko partida bat aurreikusita dago.

4. Kiroldegiaren aurrean dagoen berdegunerako proiektuan, aurreko legealdian landutakoa, aldaketa batzuk egin dira, eta partida ekonomiko bat dago lizitaziorako. Baina uda honetan ere ez dugu ur txorroten parkerik izango, ezta berdegunean jarriko diren beste elementu batzuk ere.

5. Komentuaren inguruko urbanizazioan oraindik ez da argitu zer gertatuko den Deba ibaiaren gainean proiektatutako oinezkoentzako zubiarekin, Errekabarren eta Iturrizar lotuko duena. Txarapeako igogailua ere instalatzeke dago.

6.Lausitta auzoko Hornidura eta Saneamendu Plan Bereziari dagokionez, EAJren proposamena, partida bat sartu da proiektua idazteko.

Garbiketa eta mantentze falta kaleetan

EAJk, era berean, espazio publikoaren garbiketan eta bide-sarearen egoeran jarri du arreta. "Kaleek, plazek, parkeek eta hiri-altzariek garbiketan eta mantentze-lanetan hobetzeko tarte handia dute. Udal Gobernuak jakinarazitako jarduera-ildoetako bat da, baina ez da hobekuntzarik ikusi", dio Uribetxeberriak.

"Zuloak eta hondatutako zorua ugaritzen ari dira herriko leku askotan. Basabe industrialdea, Belorrieta eta Bedarretako San Migel auzoa dira herriaren irudi txarretik haratago, egunerokotasunean oztopo bihurtu diren egoeraren adibide batzuk, oinezkoen eta ibilgailuen mugikortasunari eragiten diotenak. Duela gutxi 700.000 euroko partida ekonomiko garrantzitsua bideratu da kaleak asfaltatzeko, eta pozten gaitu, baina denbora gehiegi pasatzen utzi dute egoerak okerrera egin duen bitartean", gaineratu du Uribetxeberriak. "Gauza bera gertatzen da auzoekin. Udal Gobernuak iragarri dituen hobekuntzak ez dira oraindik iritsi".

Aretxabaletako beharrekin bat

EAJk positibotzat jotzen dituen alderdiak ere azpimarratu ditu. Alde batetik, komentu zaharraren eraikineko gizarte-zentroaren eta erretiratuen lokalaren bultzadari eman zaion jarraipena.

Energia aprobetxatzeko proiektuak ere bat datoz alderdi jeltzalearen jarduera-ildoekin. Adibidez, Fagor Ederlanen hondar-beroa erabiliko duen proiektua kiroldegia berotzeko, eta eguzki-plakak instalatuz energia-eraginkortasunean aurrera egiteko planei ematen ari zaien jarraipena.

"Oro har, desberdintasunetatik haratago, Aretxabaletarako behar eta proiektu estrategikoak partekatzen ditugu hein handi batean. Baina hitz gutxiago eta exekuzio gehiago behar dira", eskatu du EAJk. Udal talde jeltzaleak eskua luzatu du Aretxabaletaren eta aretxabaletarren ongizatearen alde lan egiteko.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak