Kantarin parte hartu duten Aretxabaletako eta Eskoriatzako gaztetxoek euskal abestiak kantatu eta dantzatu dituzte telebistako izar handien pare gaur arratsaldean. Eta horretarako, jantziak edota orrazkerak ere artisten moduan prestatuta eraman dituzte.
Arkupeko oholtza gainera igo diren izarrek txalo ugari jaso dituzte ikuskizunaz gozatzera joan diren gurasoen, familiartekoen eta lagunen partetik. Izan ere, asko izan dira ikuskizunaz zuzenean gozatu nahi izan dutenak.
Urduritasunak izan dira, noski, baina nabari izan da oholtza gainean aste ugaritan entseatzen ibili direla neska-mutiko parte-hartzaileak, gaurko egunean guztia primeran atera zedin.
Aurtengo berritasunen artean dago gainera, saioa hasi aurretik, koloretako argi-makilak eskuratu ahal direla, eta Goienakide direnek gainera, poster bat ere jasoko dute opari Kantarin parte hartu izana gogoratzeko. Eta ez direnek, zuzeneko saioetan jartzen den Goienakide gunera joanda edota Goienara deituta, Goienakide egiteko aukera daukate, ondoren, besteak beste, posterra jaso ahal izateko.
Goiena telebistan
Zapatuetan eta domeketan estreinatzen dira Goiena telebistan Kantariren saio berriak, eta astean zehar ere eskaintzen dira horiek gero. Orain, Bergaran grabatutako saioak emititzen dabil Goiena; bertan parte hartu zuten Bergarako, Antzuolako eta Elgetako gaztetxoen saioak ikus daitezke. Eta horien ostean, martxo amaiera inguruan ikusi ahalko dira gaur Aretxabaletan grabatutako saioak.
Grabazioa egingo den bailarako hurrengo herria Oñati izango da, eta azkenik Arrasaten parte hartuko dute kantari arrasatearrek eta aramaioarrek.
