2023ko abenduaren 10ean bete zituen 30 urte Aretxabaletako euskara elkarteak, eta hainbat ekitaldi antolatu zituen horren bueltan iaz. Urteurrena agurtzeko unea iritsita, haren ibilbidea jasotzen duen ikus-entzunezkoa egin du eta bazkide eta herritarren aurrean aurkeztu zuten hori atzo. Goiena Komunikazio Taldeak ekoiztu du dokumentala eta Loramendiren ibilbidearen zeresan handia izan duten bost lagun batu ditu horretarako: Jasone Gorroño, Beinke eta Loramendi elkartearen sortzaileetako bat; Iker Urkia, 2004 eta 2014. urte artean presidente izandakoa; Edorta Mendieta, Aretxabaletako Komunikabideak-Loramendi elkarteko presidente ohia; Julen Perales, ludotekako langile izandakoa eta egun zuzendaritza batzordeko kidea; eta gaur egungo presidente Lierni Zangitu.
Lagun asko elkartu ziren Arkupe kultur etxeko Zaraia aretoan hori ikusteko; elkartearen bueltan jardundakoak, une honetan dabiltzanak, bazkideak eta beste hainbat herritar. Hunkitu egin ziren batzuk eta kontu zaharrak gogora ekarri zizkieten beste batzuei. Bukaeran gustura agertu ziren dokumentalak jasotakoarekin.
Ikus-entzunezkoa Goiena telebistan ere ikusi ahal izango da; gaur, egubakoitza, 20:00etan eta 22:00etan emango dute.
