Pinturarekiko zaletasunak batu ditu hamabi herritar, eta azken urte eta erdian astean birritan elkartzen dira Arkupen, astelehenetan eta eguaztenean, zaletasun horri haizea emateko. Idoia Elexpuru irakasleak emandako aholkuei kasu eginda jarduten dute lanean, eta orain, ikusgai jarri dituzte azken hilabeteetan egindako hogeiren bat lan.
Askotariko lanak
Pinturaren bueltan ibilbide luzea dute taldeko kide askok, baina oraintsuago hasitakoak ere badaude. "Batzuek hogei urte daramatzate margotzen eta beste batzuek bi, baina horrek ez du eragiten taldearen jardunean, norberaren erritmoa errespetatzen delako. Gustuko argazki bat ekarri ohi du bakoitzak eta hori lantzen hasten da", azaldu du Elexpuruk. Estilo figuratiboa duela gustuko gehiengoak gaineratu du: "Abstraktu bakarren bat badago, baina, orokorrean, bodegoiak eta paisaiak dira nagusi, akuarelekin, olioarekin zein akrilikoarekin".
Herritarrei erakusteko gogotsu
Denbora batean utzita izan ostean, pintura eskoletara itzuli da Arantxa Irizar taldekidea: "Oso gustura nabil. Paisaiak eta bodegoiak margotzen ditut, baina orain, estilo modernoagoarekin ere hasi naiz". Pepi Rosadok, ostera, marraztea du gustuko: "Zuri-beltzean, arkatzarekin marraztea atsegin dut, eta, noski, figurak; bizitza ematen dit horrek".
Taldean giro benetan polita dutela adierazi dute guztiek. "Elkarri animoak ematen dizkiogu. Lagundu egiten digu, gainera, ohikoa ez den jendearekin gaudelako, beste kontu batzuen gainean berba egiten dugulako", dio Rosadok.
Egindako lanak herritarren aurrean erakusteko gogotsu agertu dira, gainera: "Aretxabaletarrek jakin dezatela herrian badaudela artista batzuk. Hortaz, etor daitezela Arkupera gure lanak ikustera eta goza dezatela, guk gozatzen dugun moduan". Lanak urtarrila bukatu artean izango dira ikusgai erakusketen aretoan; astelehenetik egubakoitzera goizez –11:00-13:00– eta arratsaldez –18:00-20:00– eta zapatuetan goizez bakarrik.