Urtarrilaren 2tik Durana kalean dagoen Gurean hasi dira taberna zerbitzua jasotzen Basotxo erretiratuen eta pentsiodunen elkarteko kideak. Akordioa sinatu dute bi aldeek, eta adineko pertsonentzako gizarte zentroaren lanak –komentu zaharrean– bukatu arte iraungo du.
Bazkideek %25eko deskontua
Udalak jardun du bitartekari lanetan, eta, Unai Elkoro alkateak adierazi duenez, "adineko pertsonei alternatiba bat eskaintzea" izan da asmoa, egoitza berriko taberna erabiltzeko aukera izan arte. Era berean, alkateak eskerrak eman dizkio Jon Kepa Zubillagari, Gureako jabeari, haren establezimendua "herriko erretiratuen eskura ere jarri duelako". Akordioari esker, Basotxoko bazkideek – 900 baino gehiago, guztira– %25eko deskontua dute tabernan. Horretarako, bazkide-txartela erakutsi behar dute.
Kontsumitzen diren jan-edanen prezioaren murrizketari aurre egiteko, Udalak handitu egin du Basotxo elkarteari ematen dion laguntzaren zenbatekoa.
Komentuan urte bukaerarako
Aurreikuspenak betez gero, Basotxoren egoitza berria urte amaierarako gertu egongo da komentu zaharrean; baita Udal Gobernuak abiarazitako mendekotasun txikia duten adinekoentzako eguneko arreta zerbitzua eta kaperan egokituko den erabilera askotariko gela ere.
Egoitza hori bukatu arte, gainera, Basotxoren bulegoak Zainduz gimnasioa izandako lokalean daude. Udalak hainbat obra egingo ditu hor, elkarteari "leku handiagoa" emateko eta "erosoago garatu" ahal izateko.
