Biktima guztiek egia, justizia eta erreparazioa merezi dutela adieraztearekin bat, ETAko presoei ezartzen zaien salbuespenezko espetxe politika salatu zuten Iturrizar plazan, giza eskubideen aldeko monolitoaren alboan: "10 urte pasa dira ETAk armak utzi zituenetik".
Trantsizio garaitik hona 109 zinegotzi eta alkate egon dira Aretxabaletan. Horietako 100 daude bizirik, eta 70ek babestu dute ekimena: alderdi guztietako ordezkariek, PPkoek salbu. %70eko babesa lortzea "positiboa" dela nabarmendu zuten parte hartzaileek.
Legea betetzea eskatu dute
Elkarretaratzean Garikoitz Garcia euskal preso aretxabaletarra izan zuten gogoan. 11 urte daramatza espetxean, eta azaroan Zaballara lekualdatu zuten. Horrek senide eta lagunen zigor gehigarria amaitzea ekarri zuela aipatu zuten. Hala ere, ETAko presoek legeak ahalbidetzen duen bidea egiteko "hamaika oztopo" dauzkatela salatu zuten.
Legedi arruntari jarraituz, gradu progresioaren bidean aurrera egitea aldarrikatu zuten: "Zehazki, neurri eta baimen berrietan aurrera egitea, baimen bereziak, lan egitekoak, bigarren edo hirugarren gradua lortu ahal izatea eta baldintzapeko askatasuna eskuratzea".
Halako ekimen bateratuei jarraipena ematearen alde azaldu ziren Aretxabaletako ordezkari politikoak, "elkarbizitza, konponbidea eta bakearen alde".
