Agintaldi hasieran EAJren eta EH Bilduren artean adostutako Gobernu batzordearen lankidetza eredua apurtu egin zen orain dela aste batzuk. Horren ondorioz, Gobernu batzordea berrantolatu du Udal Gobernuak, eta hori onartu zuen eguaztenean egindako ohiko osoko bilkuran; EH Bilduk aurka bozkatu zuen.
Lau lagun Gobernu batzordean
Gobernu batzordean bost lagun egon daitezke, gehienez, eta agintaldia hasi zenean adostu zuten EAJko hiru izatea –Unai Elkoro, Karmele Uribarri eta Koldo Zubillaga– eta EH Bilduko bi –Ion Albizu bozeramailea eta Mikel Uribetxebarria–. Udal gobernuaren erabakiz, baina, aurrerantzean lau izango dira ordezkari jeltzaleak, eta bakarra EH Bildukoa. Alkatearen esanetan, lanerako erosotasun falta dago euren erabakiaren atzean: "EH Bilduri esan genion bozeramailea ez genuela onartzen batzorde horretan eta besteren bat jartzeko. Erantzunik ez dugu jaso. Guk laugarren kide bat sartu dugu: Xabi Otxoa. Baina bosgarrenarendako lekua hutsik utzi dugu, noizbait sartzea erabakitzen badute haiek".
EH Bilduko ordezkariek ez dute begi onez hartu udal gobernuaren erabakia. "Nahiz eta gehiengorik ez izan eta erabakigarriak ere ez, batzordean egoteak Udalaren gorabeheren gainean ematen digun ezagutza askoz aberatsagoa da. Uste dugu gardentasun eta elkarlan ikuspegitik ere hobe dela", dio Mikel Uribetxebarria zinegotziak. Kide bat sartzeko aukera, ostera, ez dute onartu: "Baldintza bat jarri dute, eta ulertezina da erakunde batean beste batek aukeratzea alderdi baten ordezkaria zein izango den".
Ion Albizuren dedikazioa %75etik %50era murriztea ere onartu zuten –aho batez–, eta haren soldata gordina urtean 18.470,54 euro izango da orain.
Ogasun batzordea sortu dute
Aldaketa horren ondorioz, beste batzorde bat sortu dute: Ogasun batzordea. "Gobernu batzordean landu izan ditugu ogasunari dagozkion gaiak, baina alderdi guztiak ez egotera, bosgarrena sortu da", dio alkateak. Hain zuzen, bera izango da batzorde horren burua, baita Udal Planeamenduarena ere, Albizuren ordez; eta Hirigintza Sailarena Otxoak hartuko du Elkororen ordez.
Gizartegintza alorrean ere aldaketa bat egin dute: Karmele Uribarrik jarraituko du izaten Ongizate eta Berdintasun sailen buru, eta Gazteria azpi-batzorde bat sortu dute, Ainhoa Caberoren ardurapean.