Joan den azaroaren 13an hasi zituzten lehen lanak bukatu barik dauden Txarapeako bi etxebizitza-blokeetan. Ingurua garbitu zuten orduan, hondakinak kendu eta 2012an erdibidean geratu zen eraikinaren egoera egiaztatzeko probak egin. Eraikitze lanei, ostera, orain, otsailean ekingo diete eta 64 etxebizitza egingo ditu WIP Aretxabaleta Shell SLU enpresak; prezio tasatukoak izango dira 48 pisu eta salmenta libreko duplexak hamasei.
Udalak "laguntzeko" jarrera
Pozik agertu dira Udal ordezkariak bederatzi urte geldirik egon ondoren "berraktibatu" egin direlako Txarapeako lanak. "Gure helburua etxebizitza operazio hau desblokeatzea izan da", adierazi du Unai Elkoro alkateak, eta azpimarratu du horiek eraikitzen laguntzeko "erabateko jarrera" erakutsi dutela: "Udalak ahal izan duen guztian lagundu du lanak berriz hasteko prozesua errazteko. 64 pisu berri izango ditu udalerriko etxebizitza parkeak eta, horrela, Txarapeako urbanizazioa guztiz amaituta geratuko da".
Tasatuak eta duplex libreak
Sustatzaileak Construcciones Amenabar SA enpresari esleitu dizkio lanak. Eta argitu dute aurretik eraikitakoen tipologia bera izango dutela. Pisu tasatuak kokatuko dira beheko, lehen eta bigarren solairuetan; horiek izango dituzte hiru logela, bi komun, garaje-plaza eta trastelekua, 175.000 eurotik gorako prezioarekin. Hirugarren solairuan eta teilatupean, ostera, duplex motako etxebizitzak izango dira, honako ezaugarriekin: lau gela, hiru komun, garaje-plaza eta trastelekua; 258.000 eurotik gorako kostua dute horiek. Etxebizitza guztiek, gainera, terraza "zabalak" izango dituzte. Zortzi ataritan banatuko dira; lau atari bloke bakoitzean. Pisuak saltzeko ardura Aretxabaletako San Miguel Inmobiliariak izango du. Lanak, ostera, aurreikuspenen arabera, 2022ko otsailean amaituko dituzte.
Oniritzia osoko bilkuran
Udalbatzak hurrengo osoko bilkuran emango dio oniritzia Txarapeako azken bi bloke horien garapena arautuko duen hirigintza hitzarmenaren berritzeari.
2012an utzi zuen Bruesa SA Enpresa Taldeak sustapen hori osatu gabe, hartzekodunen konkurtsoan sartu ondoren. Txarapea ibilbideko urbanizazio osoak hamabi bloke ditu: 240 etxebizitza tasatuak dira, 100 libreak eta 100 babes ofizialekoak.