Ostalaritza eremuko kontsumo garaian eta eremutik kanpo musukoaren erabileran; distantzia soziala bermatzeko irizpideetan; eskuetako garbitasunean; eta taldeetan hamarreko muga ez gainditzean ipini dute fokua informazioa banatzen egon direnek. Era berean, musukoak banatu dituzte herritarren artean.
Kanpaina adin tarte guztietara zabaldu badute ere, ahalegin berezia egiten dihardute gazteengana heltzeko. "Une honetan, Koronabirusaren zabalkundea gelditzeko ahaleginean, kolektibo hori da sentsibilizazio eta pedagogia lan handiena eskatzen duena", esan du teknikarietako batek.
Hiru lurraldeetakoak
Kanpainak Eusko Jaurlaritzako Turismo eta Ostalaritza zuzendaritzak eta Euskadiko hiru lurraldeetako ostalaritza elkarteek urtero sinatutako elkarlanerako hitzarmena du abiapuntu. "Kanpainaren bitartez, hiru lurraldeetako ostalaritza elkarteek beraien hondar alea jarri nahi dute pandemia indargabetzen laguntzeko", esan dute.
Hainbat herritan
Uztailaren 24an hasitako kanpainak Gipuzkoako 40 herri bisitatuko ditu, guztira. Errenteriako eta Mutrikuko Madalena jaiekin hasi zuten, eta irailaren 13an bukatuko dute.