Oinarrizko elikagaiez osatutako produktu-sortak honako elikagaiak ditu: Kilo erdi pasta, kilo erdi arroza, 250 mililitro oliba olio, dozena erdi arrautza, eta litro bat esne, eta, egitasmoarekin, gaur, martitzena hasita bi pertsonek batu dituztela saskiak, eta beste hiru eskaera ere izan dituela adierazi du Antonio Tamayo Hankabeltz urdaitegiko jabeak.
"Denbora daramagu zenbait herritarren elkartasun egitasmoak ikusten, haurrentzako doako denbora-pasak egin dituzte… Ez genekien zer eta nola egin. Hala, oinarrizko elikagaien produktu sorta bat prestatu dugu, benetan beharra dutenen pertsonentzat, eta inolako diru iturririk ez duenarentzat, bereziki. Hala, beharra duena dendara etorri edo gurekin harremanetan jar daiteke sare sozialen bidez. Dendara, banan-banan sartzen dira bezeroak, eta norbaitek lotsa izan arren lasaitasun mezua helarazi nahi dut, bere poltsa zuriarekin aterako delako etortzen dena, barruan zer daraman jakin gabe. Bezero bat gehiago bezala".
Eskerrak egitasmoarekin bat egin dutenei
Pasta eta arroza eraman diote zenbait herritarrek Tamayori, egitasmoarekin bat eginez. Hori horrela, herritarrek duten solidaritatea gauza ederra dela gaineratu gura izan du: "Anonimoki ekarri didate zenbait elikagai dendara, eta hauei eskerrak eman nahi dizkiet egitasmoarekin bat egiteagatik. Beraiek badakite nortzuk diren, eta, beraz, eskerrik asko!. Horrekin batera, nire bizilagunari ere eskerrak eman nahi dizkiot erakutsi duen prestutasunagatik… Jendeak besteengatik egin dezakeena ederra dela uste dut, eta hala jokatu behar dugu guztiok".
