Lesboseko errefuxiatu kanpamenduetan bizi direnentzako otorduak prestatzen jardun da Zaporeak elkartea, eta elkarte horri laguntza eman asmoz jarri du martxan elikagaien bilketa UDA kirol elkarteak. Hala, sail guztietako jokalariek ez ezik, Aretxabaletako eskolek, enpresek eta herritarrek ere eman nahi izan dute laguntza, eta horri esker erronka gainditzea lortu dutela azaldu du Agurtzane Elkorok, UDA kirol elkarteko lehendakariak: "1.000 kilo elikagai biltzeko helburua genuen, eta azkenean kopuru hori gainditu dugu. Eskerrak eman nahi dizkiet laguntza eman duten guztiei".
Laster, Lesbosera bidean
Aretxabaletan jasotako guztia kamioiez eraman zuten atzo. Beste herri batzuetan bildutako elikagaiak jaso eta asmoa da datozen asteetan itsasoz Lesbosera bidaltzea. Maria Agirre Zaporeak elkarteko kideak azaldu moduan, Lesbosen egunero 1.200 otordu prestatzen dituzte bertako errefuxiatuentzat, eta beraz, Aretxabaletan bildutakoa "sekulako laguntza" izango da.