Zabor birziklatzaileekin jardun du lanean Hiruatxek azken urteotan, Kolonbiako Pasto hirian. Hain zuzen, Nariñoko birziklatzaileek eratutako Coemprender kooperatibako lehendakari Celina Imbajoaren bisita jaso dute eta hark, proiektuaren nondik norakoen berri eman zien aretxabaletarrei.
Proiektu hori bukatutzat eman dute, eta orain, Nariñoko departamentuko nekazaritza txikiari bultzada emateko asmoarekin agertu dira Hiruatxeko kideak: "Nekazari txikiei lagundu, gehienbat, emakumeengan fokua jarrita. Kasu honetan, Mundukiderekin elkarlanean aritzea ohorea da guretzat, eta fidagarritasuna ematen digu aurrera egiteko".
Aurrera jarraitzeko gogotsu
Urtea askoan lanean izan arren elkarteko kide den Oier Sarasuak jakinarazi du osasuntsu dagoela Hiruatx, hein handi batean aretxabaletarren babesari esker: "Aretxabaletako herritarren aldetik laguntza asko jasotzen dugu; azken batean, horrek animatzen gaitu aurrera egitera. Herritarrek guk egiten dugun horretan sinesten dute, gurekiko konfiantza dute".