Zabalik dago Aretxabaletako tanatorioa. Hain zuzen ere, atzo inauguratu zuten herriko industrialdean dagoen eraikina –12:00etan–. Besteak beste, Unai Elkoro alkatea eta Andoni Illarramendi parrokoa izan ziren bertan. Eta, hori eginda, gaur ireki dute tanatorioa; erabilgarri dago jada. Ohikoan, 10:00etatik 13:00etara eta 16:00etatik 18:30erako ordutegia izango du tanatorioak. "Dena den, erabiltzaileen behar eta eskaeretara molda dezakegu hori", aitortu dute tanatoriokoek. Bada, bi gela ditu tanatorioak.
Besteak beste, Arrasaten pilaturiko jende kopurua banatzea da tanatoriokoen asmoa: "Tarteka, jendea pilatzen da Arrasaten. Orain, hona etor daitezke Aretxabaletako, Eskoriatzako eta Leintz Gatzagakoak".
Era berean, "pozik" azaldu da Unai Elkoro alkatea. "Orain, herritarrek ez dute beste toki batera joan beharrik izango. Leku egokienean dago, gainera: erdigunetik gertu, bidegorri alboan eta aparkatzeko lekua ondoan duela", aitortu du.