Aratzeko familia Arkupen elkartu da gaur, irailak 23, 25. urteurreneko ospakizunak borobildu eta bukatzeko. Atzegiko ordezkariak gonbidatu dituzte: Mitxel Lakunza zuzendaria, Jose Luis Zaldua presidentea eta oraintsu erretiratu den Jose Luis Basoko, besteak beste. Eta Aratzen inguruan lagun izandako asko ere inguratu dira.
Historia eta etorkizuna
Unai Elkoro alkateak hartu du hitza lehenengo, eta bai alkate lez, bai elkarteko guraso lez, Aratzen aldeko konpromisoa hartu du.
Elkarteko idazkari Jokin Antxiak atzera begiratua egin du ondoren, eta Aratzen sorreraren eta nondik norakoen berri eman die. Elkartea abian jarri zuten hamalau familiak izan ditu gogoan; han edo hemen laguntza eskatzerakoan jasotako erantzun bikaina; urteotan egindako ekintzak; eta Aratzen bueltan sortutako familia giroa: "Nire anaia hil zen baina nik oraindik hemen jarraitzen dut", esan du hunkituta. Era berean, gogorarazi du belaunaldi aldaketa dutela egitekoen artean, "atzetik datozen belaunaldi berriek ardura hartu, Aratzek aurrera egin dezan".
Atzegiko Jose Luis Basokok, ostera, Aratzen balio soziala azpimarratu du: "Lortutako guztia zuen lanaren eta ekimenaren fruitua da". Eta gaineratu du: "Adimen urritasuna dutenak errespetatuak eta maitatuak izatea lortu duzue". Aurrera begira jarri da gero Basoko, eta Atzegik etorkizunerako dituen erronkak gogorarazi dizkie.
Esker opariak
Unerik hunkigarriena iritsi da gero; dagoeneko ez daudenak gogoan izateko unea. Argazki bidez ekarri dituzte gogora. Eta ondoren, eskerrak ematera egin dute salto. Sorrerako familiei, arrazoi bategatik edo besteagatik laguntza emandakoei eta elkartera sartu berri diren familiei oparitxoa eman diete: Irantzu Irazolak egindako artisau lana, poesia batek lagun eginda.
Ekitaldia umoretsu bukatu dute Oihulari Klown taldeko kideei esker.
