Aretxartek antolatutako desfilea neguan egingo dute lehenengoz; izan ere, Herriko Plazan jarritako karpari esker eguraldi txarraren beldurrik ez dute merkatariek.
Hain zuzen bihar, kaleetan, piztuko dituzten Gabon argiekin batera, desfilearekin ere egunotako jaiak girotu gura dituzte.
Ekitaldia girotuko dute musikak eta dantzariek eta alfonbra gorrian atzera eta aurrera, 50en bat herritarrek jardungo dute modelo lanetan. Modelo horiek erakutsiko duten generoa izango da honako komertzioetakoa: Belar Meta arropa denda; Haurrak eta Kilima umeen arropa dendak; M-5 kirol denda; Gemes estetika zentroa; Lie lurrindegia; eta Laura ile-apaindegia. Eta generoa erakutsita herrian bertan kontsumitzera animatu gura dituzte herritarrak egunotan, urteko beste edozein egunetan lez: "Bizi, erosi Atxabaltan", dio Idoia Elexpuru presidenteak.
Gabonetako azoka
Desfileak hain zuzen Gabonetako azokari egingo dio ongietorria. Izan ere, zapatuan eta domekan herritarren postuak izango dira Herriko Plazako karpan. Artisauek, ekoizleek, elkarteek eta Aretxarteko merkatariek izango dute lekua han, eta guztira hogei postutik gora elkartuko dira. Jatekoa eta edatekoa ere eskainiko dute han, eta aurtengo karpa iazkoa baino zertxobait handiagoa denez erosoago egon ahal izango dira bai erosleak baita saltzaileak ere.
