Alkartetxea EH bilgune ere izango da aurrerantzean. Hegoaldeko lau hiriburuetakoen ostean, koalizioaren horrelako bosgarren egoitza da Aretxabaletakoa; lanerako eremu bai, baina herritarrekiko hartu-emanerako ere bai, EH Bilduko arduradun Pello Urizarren esanetan. Urizarrekin batera, besteak beste, Rebeka Ubera, Lore Martinez, Maider Otamendi eta EH Bilduko herriko beste zenbait kide izan dira inaugurazioan.
Egoitzarekin batera, komunitatea deitu dutena ere aurkeztu dute, EH Bilduren Interneteko sare sozial gisako tresna.
Ekitaldiko mezu politikoari dagokionez, Pello Urizarrek adierazi du ez duela uste Madrildik aldaketa sakonik iritsiko denik, baina gaineratuz aldaketarako aukera badago eurak hor egongo direla, zenbait baldintzarekin: erabakitzeko eskubidea praktikara eraman ahal izateko konpromisoa; bakearen eta elkarbizitzaren aldeko konpromisoa; eta eraldaketa sozialerako konpromisoa.
Ez du, ordea, fede askorik agertu, eta Euskal Herrian aldebikotasuna eta Madrilekiko akordioak helburu jartzen ei dituztenei esan die ondo dagoela Madrila eskean joatea, baina hemengoon artean adostu egin behar dela han ezezkoak jasotakoan ze bide hartu.
