Gobernu Batzordean bost kide egongo dira, horien artean EH Bilduko eta Alderdi Sozialistako bana

Agintaldiko lehen osoko bilkura egin zuen udalbatzak atzo, astelehena. Ezohikoa izan zen eta inbestidura ekitaldia legez Arkupe kultura etxeko bigarren solairuko gelan egin zuten. Hantxe egingo dituzte guztiak, udaletxean igogailua jarri bitartean. Eta erabaki zuten ohiko osoko bilkurak bi hilabetean behin egitea, hilabeteko hirugarren astelehenetan hain zuzen ere; lehenengoa izango da uztailaren 20an.

Gobernu Batzordea zelan osatu duten jakinarazi zuen Unai Elkoro alkateak. Bost kide egongo dira, hiru EAJkoak: alkatea bera, Mikel Uribetxebarria eta Aitor Gabilondo; bi horiek izango dira gainera, alkateordeak. Eta gero egongo dira EH Bilduko Jon Albizu eta PSE-EEko Miren Lorea Lana. "Ondo informatuta egoteko modurik zuzenena Gobernu Batzordean egotea dela uste dugu  eta eskaintza egin diegu", jakinarazi du Elkorok, eta gaineratu du: "Ados egongo ez garen puntuak izango ditugu, seguru, baina oraingoz harremana ona da alderdi guztien artean eta eskaintzak begi onez hartu dituzte". Hala, Irabazik ere interesa agertu duela Gobernu Batzordean egotean dio eta hori zelan bideratu aztertuko dutela.

EH Bilduko kideek onartu egin dute eskaintza hori: "Jarrera irekiarekin eta akordioak bilatzeko gogoz heldu nahi diogulako lanari", jakinarazi dute eta gaineratu: "Eguneroko erabakiak hartzen diren foroan egotea gura izan dugu, proposamenak egiteko eta eztabaidetan parte hartzeko". Hala ere, argi utzi gura izan dituzte hainbat zehaztasun. "Gobernuan egoteak ez du esan nahi gobernuaren parte garenik. Libre sentitzen gara gure lekutik lan egiteko". Era berean, EAJri zera eskatu diote: "Gure presentziaren egonkortasuna bermatzea. Eta parte-hartzea muturreraino eramateko jarrera gauzatzen dela ikusi nahi dugu. Horretarako EAJk zubiak eraiki beharko ditu, parte-hartze ordenantza sortuz, adibidez".

Bederatzi batzorde

Gainerako Udal batzordeak ere osatu dituzte eta asteleheneko osoko bilkuran onartu. Bederatzi izango dira: "Aurreko agintaldian baino pare bat gutxiago daude, eta behar bada aurrerago, urtea bukatzeko-edo gutxiago izan daitezke. Parte-hartzeari dagokionez, esaterako, parte-hartze politika bat definitu gura dugu eta gero beste batzorde guztietan aplikatu hori. Hortaz, behin aplikatuta ez lukeela zentzurik izango batzorde horrek uste dugu", argitu du Elkorok.

Hona batzordeak:

  • Hirigintza, Obrak eta Ingurumena               Unai Elkoro                  Jon Albizu/Xabier Igartua
  • Gizarte Zerbitzuak eta Berdintasuna            Nerea Etxabe               Hector Prieto/ Jon Albizu
  • Kirola                                                       Mikel Uribetxebarria      Oihane Etxebarria
  • Hezkuntza eta Euskara                              Aitor Gabilondo            Irati Pagoaga
  • Kultura                                                    Joxe Migel Uribarren     Oihane Etxebarria
  • Garapen Ekonomikoa eta Enplegua            Unai Elkoro                  Xabier Igartua
  • Ogasuna                                                 Unai Elkoro                  Oihane Etxebarria
  • Gazteria                                                  Nerea Etxabe               Irati Pagoaga
  • Parte-hartzea eta Komunikazioa                Unai Elkoro                  Irati Pagoaga

 

Alkateak jasoko duen soldata ere onartu zuten; lan jardun osoz egongo da udaletxean aste honetan hasita, eta jasoko du 45.000 euro gordin urtean, uztailaren 1etik aurrera.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.