Musikarien zaindaria da Santa Zezilia eta euskal musikariek ere hainbat ekitaldi egingo dituzte egunotan. Euskal Herriko Musika Eskolen Elkarteak deituta, esaterako, Musikalean hau da, musika kalean, egitasmoa antolatu dute bosgarren urtez, eta Aretxabaletako Leizarra musika eskolak ere bat egin du egitasmo horrekin.
Bandako kideak, biolin-joleak, zeharkako txirulariak, perkusio-joleak, trikitilariak, pandero-joleak eta abeslariak, guztiak elkartu ziren Mitarte kalean eta handik, kalejiran, Herriko Plazara jo. Guraso, senide, lagun eta herritar asko ziren kale bazterretan musikari gaztetxoen ekitaldia ikusteko.
Euskal kantuak izan ziren protagonista eta herritarrek gustura entzun zituzten. Behin ekitaldia bukatuta txokolate beroa eskaini zieten lanean jardundako guztiei.
Gabonetako kontzertua abenduaren 16an
Santa Zezilia eguna kalean ospatu zuten, jai giroan. Datorren hilabetean, ostera, kontzertu serioagoa eskainiko dute parrokian. Gabonetako kontzertua izango da eta abenduaren 16an izango da.
