Horren egitekoa izango da herritarrak "integratzea" Udalaren erabakietan eta kudeaketan. Herriaren gainean Udalak hartzen dituen erabakietatik "gertu" sentiarazi gura ditu herritarrak, eta aretxabaletarren iritzia kontuan hartuko dutela Udal ordezkariek jakinarazi du.
Udalaren kudeaketa eraldatzeko prozesu baten barruan kokatu du bere burua Iraetak. Eta herritarrek eskubideak dituzten neurrian ardura batzuk ere badituztela gogorarazi du. Hala, iritzia emateko aukera izango dute, baina era berean, formazio prozesu bat ere izango da horiendako, guztiek ikasi beharko dutelako zer den parte hartzea. Izan ere, edozein erabaki hartuta ere herria izan behar dela onuradun, eta ez hainbeste norbanakoa, jakinarazi du.
Bai Ana Bolinaga alkateak, bai Ainara Iraetak berak parte-hartze teknikariaren figurak duen garrantzia azpimarratu dute politika egiteko kultura "berri" baten barruan.
