18:00etan barik, 20:00etan egin zuten gazteek jaien estreinaldia. Edozelan ere, atzoko eguraldi eskas eta freskoak kikildu barik, Aretxabaletako berotasuna aldarrikatu zuten mozorro tropikal eran, eta horrela, kolore biziz jantzita eta loreekin apainduta igo zuten gazteendako jaien hasiera iragartzen duen Mozkorra tomatea.
Etxafuegoen danbatekoek lagundu zioten hari igoeran; baina lehenengo gazte pregoilari Idoia Sanchezen berbak entzun zituzten txalo zaparrada artean.
Hona hemen pregoia:
"Herriak ez du aberastasuna txanponetan bilatzen (…). Ez dira konturatzen herriaren altxorrik handiena herritik eta herriarentzat sortzen diren gauza txikietan dagoela. Txiki-handietan; irribarreetan; arazoei aurre egiteko auzo-lanean, adierazpen askatasunean; ametsenganako distantziak denon artean moztean; kilometroak ezabatzean; herritarrak herrian edukitzean. Hau denau ordaitzenko ez dago txanponik, ez zifrarik ere, baina batzuek ez dute hori sekula ulertu. Goazen gure eta ingurukoen begiak zabaltzera. Gaztediaren indarra azaleratzera; harra mugiaraztera. Jantzi dezagun Aretxabaleta bizitasunez eta kolorez jai egun hauetan. Nondik gatozen eta nora goazen argi edukitzera; lekuz kanpo dagoen edozein jarrera onartu barik. Gora Aretxabaletako jaiak eta Aretxabaletako gaztedia!"