Kanpoko frontoian izan da oraingo erasoa. Sua egin zuten eta kantxako zorua "zeharo hondatuta" geratu da. Udalak jakinarazi duenez, kalteen balorazio ekonomikoa egiten ari dira, baina aurreikusten dute kantxa ezin izango dela epe motz edo ertainean konpondu.
Kalteen balorazio ekonomikoa egiten
Era berean, azken asteotan Udal eraikinetan eta parkean izandako kalte eta eraso guztien kostua ere zenbatzen ari da. Balorazio ekonomiko horrekin, Ertzaintzara joango da Udala, Udal eraikinetan eta parkean egindakoaren aurrean, salaketa jartzeko. Udalak jakinarazi du gainera, ez dela salaketa jarriko duen lehen aldia, eta azkena izatea espero duela.
Bilerak, gazteekin eta gurasoekin
Martitzenean hasi zuen, bestalde, Udalak bilera-erronda herriko gazteekin eta haien gurasoekin, egoerari nola aurre egin elkarrekin hausnartzeko. Udaletik adierazi dute "partaidetza handia eta erakutsitako inplikazioa positiboa" izan dela.
Eta bilera-errondarekin jarraitzeko, egubakoitzean, 17:00etan udaletxeko osoko bilkuren aretoan, bigarren bilera bat egingo dute 2009 eta 2010ean jaiotako gazteekin eta haien gurasoekin.
