Goizean aurkeztu dute Gasteizko Izaskun Arrue kulturgunean, 2026ko Arabako Bertsolari Txapelketa, hamazazpigarren aldia izango da aurtengoa eta egitura hau izango du: hiru saio egingo dituzte lehen fasean egongo diren hemezortzi bertsolariek –horietatik zazpi dira aramaioarrak–, hamabi bertsolari sailkatuko dira finalaurrekoetara eta sei bertsolari izango dira finalean. Bertsolari bakoitzak behin baino ez du kantatuko fase bakoitzean.
Aramaioko zazpi
Arabako hemezortzi bertsolarik hartuko dute parte aurtengo Arabako Bertsolari Txapelketan eta horietatik zazpi izango dira aramaioarrak: Aitor Ugarte, Andere Arriolabengoa, Danel Herrarte, Martin Abarrategi, Peru Abarrategi, Sabin Abarrategi eta Xabi Igoa.
Egutegia
Lehenengo faseko lehenengo saioa otsailaren 7an jokatuko da Oionen eta bertan parte hartuko dute, esaterako, Aramaioko Abarrategi anaietako bik; Martinek eta Sabinek. Eurekin batera lehiatuko dira Aroa Arrizubieta –2024ko Arabako Bertsolari Txapelketako irabazlea–, Felipe Zelaieta, Iñaki Viñaspre eta Unai Anda.
Bigarren saioa otsailaren 15ean jokatuko da Laudion eta bertan parte hartuko dute Aramaioko Aitor Ugartek, Andere Arriolabengoak eta Peru Abarrategik, beste hauekin batera; Ekaitz Samaniegorekin, Hegoi Amabizkarekin eta Manu Bendalarekin.
Hirugarren saioa, berriz, otsailaren 21ean izango da Izarran eta Danel Herrarte eta Xabi igoa aramaioarrak izango dira, beste hauekin: Asier Otamendirekin, Eli Zalduarekin, Maddi Agirrerekin eta Rikardo Gonzalez de Duranarekin.
Finalaurreko bat, Aramaion
Lehenengo fasearen ostean, lehenengo finalaurrekoa jokatuko da martxoaren 7an Dulantzin, eta bigarrena, berriz, Aramaioko kultura etxean izango da martxoaren 14an. Aramaioko saioan, gai-emaile lanak egingo ditu Lierni Altuna aramaioarrak.
Finala, berriz, martxoaren 28an izango da Gasteizko Europa Biltzar Jauregian.
Sarrerak, hilaren 22tik aurrera
Sarrerak hilaren 22tik aurrera jarriko dituzte salgai helbide honetan. Eta saio bakoitzaren aurretik, sarrerak agortuta ez badaude, erosteko aukera ere izango da.