Hamabost bat lagun aritu dira auzolanean goizean zehar, hiru taldetan banatuta herriko txoko desberdinetan aritu dira lanean. Zenbait herritar goizeko 9etan Aramaioko Eguneko Arreta Zentroan bildu dira paretak margotzeko. Beste batzuk frontoi atzeko sustrai eta bedarrak kentzen aritu dira eta hirugarren talde bat Andra Mari aldera hurbildu da.
"Andra Marira iritsi garenean sorpresa on bat izan dugu, izan ere, jakinaren gainean geunden aramaioar batzuk garbiketa lanetan zebiltzala, baina ez genekien bide guztia garbituko zutenik", dio Asier Agirre Aramaioko alkateak. Hori horrela, sasi-garbitzeko makinak hartu eta Azkoagarantz abiatu dira, Sorgin zubiko bidea garbitzeko.
