Festatik izan du denboraldi irekierak Iturrietan. Arrasateko Ttakun txalaparta taldearen eta Eskoriatzako trikitilarien doinuek hartu zuten sagardotegia, eta horri gehitzeko Xabi Igoa eta Martin Abarrategi bertsolari aramaioarrek bina bertso kantatu zituzten. Haiek izan ziren, gainera, aurtengo uzta probatu zuten lehenak.
Enologoen ustez, oso sagar ona batu da eta horrenbestez, sagardoa ere ona atera da. Herritarrek baieztatu dute hori, baita sagardotegira joateko ohitura dutela ere.
Zapatuetako bazkalorduak beteta
Denboraldia hasi baino ez da egin eta Iturrietan dagoeneko ekainera bitarteko zapatuetako bazkalorduak beteta dituzte. Gainera, prezio apalagoa duten menua ere jarri dute, baita Arrasate, Aretxabaleta eta Eskoriatzatik autobus zerbitzua ere.
Denboraldia oraintxe hasi bada ere, Iturrietako ugazaba Peciñak aurreratu du datorren urteko Arabako denboraldia ziurrenik euren sagardotegian hasiko dela, eta dagoeneko badu buruan ekitaldi hori.
