Eltziako topagunean egindako aurkezpenean Emakumion Etxiak izango duen barne antolaketa aurkeztu zuten. Erabakitze fasean adostutako behar eta eskaerak Juntura arkitektura kooperatibak diseinatu ditu. Edurne Izagirre arkitektoak eman zituen azalpenak: "Espazioa moldagarria izatea ezinbesteko ikusi dugu, beharren araberako erabilera emateko. Hortaz, ez dugu espazio bakoitza bere horretan pentsatu; etxean bertan, sekuentzia ezberdinak nola gurutzatuko diren bermatu dugu".
Izaro Elorza alkateak azaldu du hirugarren fasean etxearen beraren funtzionamendua eta erabilera adostuko dutela. Oraindik erabakitzeke dituzte hirugarren faseko datak.
Lanak martxa onean
Emakumion Etxia izango dena zehazteko prozesuak aurrera jarraitzen duen bitartean, Kale zaharreko eraikinaren eraberritze lanak martxa onean doaz. Barrua guztiz hustu dute, eta teilatua ere kenduta du eraikinak. Kanpo egitura geratzen da gaur gaurkoz.