46 postuetan zehar, denetarik zegoen: eztia, barazkiak, gazta, artisauen egurrezko produktuak, gatza, onttoak, era guztietako ukenduak, albokak, pastelak eta gozokiak, ogiak, telazko poltsak eta arropak, saskiak, Aita Mari barkuari buruzko informazio postu bat, askotariko bitxiak... eta baita Aramaioko kalabaza erraldoi bat; Uribarri auzoko Mendako baserrikoek ekarri dute, eta 50 kilogramotik gora pisatzen dituela adierazi dute.
13:00ak inguruan Papargorri abesbatzakoek bi kantuko emanalditxoa egin dute eliza kanpoaldean. Txoria txori eta Hertzainak taldearen Aitormena kantua abestu dituzte, azken hau ukitu moderno eta txalogarri batekin, gainera. Ostean, dantza taldekoek hartu diete lekukoa, hiru taldetan banatuta: haurrak, gazteak, eta helduak. Trebe-trebe egin dute dantza, ikusleak elizako eskaileratan zeuden artean.
Eguna borobiltzeko, erretiratuek bazkaria egin dute frontoian, eta 100 lagunetik gora batu dira mahaiaren bueltan.