Taldeko kide Maria Izagak, ezustean –taldekideek ere ez zekiten–, prestatutako idatziaren irakurketarekin hasi zen saioa, ezin modu hunkigarriagoan. Abesbatza bat zer den, eta eurena, Papargorri, zer den azaldu zuen, eta negar malkotan utzi zituen hainbat, Larraitz Arriolabengoa zuzendaria tartean.
Ondoren etorri zena bidaia bat izan zen. Papargorrikoek irudikatu zuten aurtengo jai bezperako saiorako partiturak falta zituztela, eta munduan zehar ibili ziren partituron bila: Zeelanda Berria, Japonia, Mexiko... eta abeslariek herrialde haietako kantuak kantatu zituzten.
Ia ordubeteko saioaren ostean, eztanda egin zuen giroak, eta publikoak biziki eskertu zuen Papargorrikoek ez atzo bakarrik, baizik eta hilabete luzeetan egindako lana. "Zailtasunak gaindituta, ze izan dira, aurrera atera dugu proiektua; talde lan izugarria izan da, gutako bakoitza izan da garrantzitsua", zioen Arriolabengoa zuzendariak, euren abesbatza "familia bat" dela ere nabarmenduz. "Oso pozik" zeuden taldekide guztiak oholtzako lanak amaituta.
