Gureia auzoko lanak esleitu dituzte ezohiko osoko bilkuran

Xabi Gorostidi 2016ko abe. 15a, 13:11

Aurkeztutako zazpi enpresen artean Excavaciones Arrasate s.l. enpresaren aurrekontua izan da lehiaketako garailea, aukerarik merkeena baja-temeraria egoeran zegoelako. Lanen esleipena aho batez onartu ostean 2017ko auzolanetarako eta obra txikietarako diru laguntzak eskatzea ere onartu dute bi alderdiek.

Ezohiko osoko bilkura egin dute gaur, eguena, Aramaioko Udalbatzako ordezkariek. Hiru puntu bozkatu dituzte baina horietan garrantzitsuena Gureia auzoko euri urak bereizten dituen saneamendu sarea, elektrizitate, kale argiteria eta telefono kanalizazioak eta zoladura proiektua esleitzearena izan da.

Urteko proiekturik garestienetakoa izanik, urtea amaitu baino lehen lanak esleitzea zen Udalaren asmoa, horrela diru-laguntzak baliatu ahal izateko, eta aho batez onartu dute lanen esleipena.

Zazpi aurrekontu

Eraikuntzako enpresek azaroaren 17ra arte eduki zuten euren aurrekontuak aurkezteko epea, eta guztira zazpi enpresa aurkeztu ziren. Hirigintza batzordean proposamenak aztertu zituzten, baina guztietan aukerarik merkeena zena baja-temeraria egoeran zegoen.

Gainontzeko aurrekontuekin alde nabaria zuela ikusita, euren proiektuaren nondik norakoak azaltzeko aukera eman zitzaion Asfaltados y construcciones Morga enpresari. Emandako azalpenek ez zituzten teknikarien zalantzak argitu, eta ondorioz, Excavaciones Arrasate s.l. enpresari esleitu zaizkio lanak. Azken hauek aurkeztutako aurrekontua 417.877,90 eurokoa da BEZ-a barne.

Auzolanak eta obra txikiak

Eguneko beste bi puntuetan auzolanetarako eta obra txikietarako diru laguntzak eskatzea onartu dute aho batez. Arraga auzoan areka batzuk egitea eta kiroldegiko lanen bigarren fasea aktibatzea izango dira finantzatuko diren lanetako batzuk.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak