Kantabriako txapeldunak jaun eta jabe Aramaioko Rallysprintean ere

Kantabriatik etorritako Jonathan Cabo eta Urbano Alonso nagusitu ziren lasterketan, zergatik diren Kantabriako txapeldunak erakutsiz. Kantabriako txapeldunek eta bigarren geratu ziren nafarrek lehia estuan jardun zuten. Lehenengo eta hirugarren txandatan guztiz berdinduta ibili ziren, eta bigarrenean ateratako bi segundori esker irabazi zuten Cabok eta Alonsok.

Motor hotsak, goma erre usaina eta abiadura izan ziren nagusi Aramaion, zapatuan. Uribarri auzoan hasi eta Andra Mariko bidegurutzeraino, 7,8 kilometroko ibilbidea egin zuten Aramaioko XIII. Rallysprinta jokatu zuten 65 automobilek. Kantabriatik etorritako Jonathan Cabo eta Urbano Alonso nagusitu ziren lasterketan, zergatik diren Kantabriako txapeldunak erakutsiz.


Ibilbide polita baina zaila

Ibilbide polita da Aramaioko auzoen artean egiten dena, eta ikuskizun polita autoek sortzen dutena. Hori horrela, ikusle ugari pilatu zen, aurtengoan ere, bide bazterretan. Inhar Amenabar pilotu aramaioarrak eta era berean antolatzaileak, zera zioen: "Zati politak ditu eta jendeak gustuko du. Estuguneak ditu, zona zabalak ere bai; orain gora, orain behera… Hortaz, polita benetan". Baina hainbat piloturen esanetan zaila ere bai: "Zaila, arriskutsua eta teknikoa". Hori edo beste arrazoi batzuk tarteko hemeretzi autok ez zuten bukatzerik izan. Amenabar pozik zegoen bukaeran: "Kolperen bat edo beste egon da baina ezer larririk ez". Euriaren beldur izan zirela onartu zuen: "Une batean euria hasiko ote zen pentsatu dugu. Baina ez denez horrela izan lasterketa ondo joan da, eta antolaketa kontuei dagokienez pozik gaude emaitzarekin".


Lehia estua lehen bien artean

Azken urteotan pilotu bat gonbidatu izan dute lasterketara; iaz Kataluniatik etorri ziren eta aurten Kantabriatik: "Iazko kataluniarrek arazo batzuk izan dituzte eta ezin izan dute etorri, baina Kantabriakoekin ere gustura". Jonathan Cabo pilotua eta Urbano Alonso kopilotua etorri ziren Renault Clio Maxi Kit Car autoarekin. Eta horiexek izan ziren nagusi (15:27.500). Bigarren postuan geratu ziren Mattin Villares eta Andoni Blas, horiek ere Renault Clio Maxi autoarekin (15:29.700); eta hirugarren, Iban Tarsicio eta Iñigo Peña (15:37.100) Mitsubishi Evo IX ibilgailuarekin. Kantabriako txapeldunek eta bigarren geratu ziren nafarrek lehia estuan jardun zuten. Lehenengo eta hirugarren txandatan guztiz berdinduta ibili ziren, eta bigarrenean ateratako bi segundori esker irabazi zuten Cabok eta Alonsok.

 

Debagoiendarren emaitzak

Debagoieneko ordezkaritza ere izan zen Rallysprintean. Eta bikote bakarrak jaso arren saria lasterketa politak egin zituzten gehienek. Pv1 edo lehenengo klasean Arrasateko Unai Bengoa eta Ander Garcia bigarrenak izan ziren, eta Eskoriatzako Gorka Ibabe eta Nekane Santos oñatiarrak laugarrenak. Hain zuzen Bengoa eta Garcia junior mailan ere sartzen dira, eta saria eskuratu zuten hor. Lasterketa "txarra" egin zuten; izan ere, lehenengo txandan kolpea eman zioten autoari eta gero hala moduz ibili zen. Hala eta guztiz, maila horretako gainerako autoek ez zuten bukatu lasterketa eta sariarekin itzuli ziren etxera, "benetan oso pozik".
Eskoriatzako Joseba eta Aitor Frutos anaiak bigarrenak izan ziren Pv3 klasean; eta Pv10 klasean, Inhar Amenabar eta Agurtzane Zubieta bosgarrenak. Gorka Idigoras eskoriatzarrak eta Monika Muñozek, ostera, ezin izan zuten bukatu lasterketa.
Amenabar pozik zegoen Zubieta kopilotuarekin batera egindako lanarekin: "Orain dela urtebete kolpea eman nion autoari eta gaur arte ez dut ibili. Ondorioz, lehenengo txandan urduri ibili naiz, baina lasterketak aurrera egin ahala gero eta gusturago jardun dut".

Txapelketa bukatzeko bakarra

Aramaioko lasterketa denboraldiko zazpigarren proba izan da. Euskadiko txapelketa bukatzeko bakarra geratzen da, Goierrikoa; azaroaren 15ean jokatuko dute.

Erlazionatuak

SASKIBALOIA: Garaipena MUrentzat 'in extremis' eta puntu bakarrarengatik

Arrasate

Euskal Kopako partiduari dagokionez, doi-doi eta azken segundoan irabazi zieten Larreategiren mutilek Santurtzikoei. Azken aurreko 12. segundoan ba...
FUTBOLA: Antzuolarren hutsegiteek ekarri diote garaipena Eztalan hernaniarrei

Antzuola

Nahia eta ezina. Antzuolarrek dena eman gura zuten eta saiatu ziren arren, ezin izan zuten zapatu arratsaldean etxeko partidua defendatu. 1 eta 4ko...
GOITIBEHERAK: Julen Agirreburualde nagusi Eskoriatzako Lasterketan

Eskoriatza

Eskoriatzako II. Goitibehera Lasterketak pilotu eta zale ugari elkartu zituen Apotzaga auzotik Intxaurtxuetara bidean. Izan ere, han jokatu zen Eus...
UDAko taldeen aurkezpen ofiziala

Aretxabaleta

Atzo, barikua, UDA kirol elkarteak 2014-15 denboraldirako taldeen aurkezpena egin zuen. Bete egin zen herriko plaza jarraitzaile eta kirolariz.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.