Herritarrekin egon ostean Orobengoak GOIENAri azaldu dionez, era baketsuan atxilotu dute Muxika. Hala ere, tentsio uneren bat bizi izan da; Orobengoa bera atxiloketa saihesteko autoaren aurrean lurrean etzan denean, hain justu: "Arrastaka kendu naute bidetik eta saihetsean ere eman dizkidate zenbait kolpe", adierazi du.
Era berean, azken asteetan jarraituak sentitu direla ere aitortu du Orobengoak: "Azken hilabete osoan zehar auto susmagarri ikusi izan dugu lekuz aldatzen eta herritarrek ere sumatu dute poliziaren presentzia. Gu bizitza normala eramaten saiatu gara", gaineratu du.
Irati Muxikaren mezua
Irati Muxikak honako mezua helarazi gura izan du atxilotu aurretik grabatutako bideoan:
"Desobedientziaz libre bizitzea zer den... herri bizitzan parte hartzea... ezkutatzea eta lanean jarraitzea... guztia posible izan da azken hiru hilabeteetan. Negu hasiera honetan bereziki gure etxeko atea ireki denean, ekonomatoan berriz burubelarri sartzean, mendi irteeran parte hartzean.. Iratira lanera itzultzeko aukera izateraino. Hau baldin bada desobeditzea, lanerako tresna paregabea dela esango nuke. Normaltasunez bizi dugulako, ekarpen asko bil ditzakeelako, etengabeko metamorfosian den harresia osatzen ari gara maskara, alboka, kopla, azoka, kontzentrazio eta txalaparta doinuz."
