Herriko jaietako ekitaldi nagusienetako da urtero uztaileko hirugarren zapatuan egiten den Antzuolako Alardea, eta horren erakusgarri da bai antzuolarren eta baita kanpotik etorritakoen artean ere pizten duen ikusmina. Eta aurtengoan ere halaxe izan da.
Aurretik herrian zehar egindako kalejiraren ostean, herriko plazan gozatu ahal izan da 19:00etan hasi den ekitaldi nagusia, beste urte batez Alardeko kapitaina gorpuztu duen Lander Dominguez eta Abd-Al-Rahman III.aren papera egin duen Zishan Tariq protagonista berezi izan dituena. Baina nola ez, txistulariek, danbor-joatzaileek , dantzariek, armadunek… ere ezinbesteko parte hartzea izan dute.