Binakako txapelketa nagusia aurkeztu du Ados Pilota elkarteak, Antzuolan. Bihar hasiko da Latasan (Nafarroa), eta apirilaren 21era arte luzatuko da. Hirugarren edizioa izango da datorrena, eta Iera Agirre Ados Pilota elkarteko kideak eta pilotariak jakinarazi du "inoiz baino indartsuago" daudela.
Hain justu, 58 partidu jokatuko dira guztira. Promozio mailan lau bikote arituko dira lehian eta lehen mailan, berriz, zazpi. Lehen itzulian liga erako bat egingo da, joan-etorrian, eta horrek ahalbideratuko du pilotari bikote batzuk hurrengo faseetara sailkatzea. Promoziokoei dagokienez, sailkatuko diren bi bikoteek zuzenean jokatuko dute finala; lehen mailan, aldiz, lehen lauek finalerdiak jokatuko dituzte, eta bi bikote garaileek, ondoren, finalak.
Finala, Antzuolan
Antzuolan jokatuko da final handia apirilaren 21ean. Elkarteak iazko txapelketa amaitu aurretik jaso zuen finala han jokatzeko proposamena, eta Agirrek aitortu du "oso eskertuta" daudela, udalak "arnasgune" dituztelako. Gainera, babes hori izanda, errazagoa zaie emakume pilotari profesionalen ikusgarritasuna bermatzea.
Pilotari horien artean badira debagoiendarrak ere. Nagore Galeano antzuolarra, esate baterako, promozio mailan arituko da, Perez bikote duela. Lehen mailan, berriz, Leire Galeano antzuolarra eta Maddi Barrokal bergararra arituko dira.