Irailaren 19an, martitzena, egin zuten lehen batzar irekia, euskararen kale erabilerak behera egin duela jakinda. Jasotako datuen arabera, herritarren %74,8 gai da euskaraz hitz egiteko, baina soilik hamarretik seik hitz egiten du hizkuntza horretan kalean.
Hamar herritarrek osatutako taldea bildu zen, eta Olatz Lezeta alkateak eta Miren Zubikarai euskara teknikariak lagun izan zuten UEMA Udalerri Euskaldunen Mankomunitateko teknikaria ere, lehen batzarra gidatu ahal izateko. Azalpenak eman zituzten, eta herritarrek euren ikuspegia emateko aukera ere izan zuten, Udaletik uste baitute hobe dela elkarrekin egitea "hiru pertsonaren artean" egin baino.
Hurrengoan, beste bat
Lehen urratsa beraz, egina dute, herritarrekin batu baitira, baina orain aurrera begira eman nahiko lituzketen pausoak zehaztea falta da. Horretarako, inkesta bat pasatu dute batzarreko parte hartzaileen artean, maiztasunak eta asmoak jakin asmotan.
Datozen asteetan zehaztuko dute datorren bileraren data zehatza, eta Udalak jakin bezain pronto jakinaraziko du.
